Nadakpan na kahapon sang hapon ang isa sa mga nagpatay sa manunudlo sa Binalbagan Catholic College kahapon sang kaagahon.
Sa interview sang Bombo Radyo Bacolod kay Police Major Randy Babor, hepe sang Binalbagan Municipal Police Station, nadakpan na ang 19 anyos nga isa sa mga suspetsado sa pagpatay kay Tony Lazaga, 51 anyos, kag newly-appointed nga adviser sang Supreme Student Government sang Binalbagan Catholic College.
Ang suspetsado ang ginkilala nga si Johnrey Castino alyas Jansen, 19 anyos kag residente sa Purok Apitong, Barangay San Teodoro, Binalbagan.
Suno sa hepe, natumod ang suspetsado pinaagi sa CCTV footage kag may-ara man sang mga witness nga positibo nga nagkilala diri.
Madumduman nga nasapwan nga wala na sang kabuhi ang manunudlo pasado ala-1:00 sang kaagahon kag ini ang nag-agom sang 16 ka pilas sa pagpamuno.
Bangod tagadidto lamang sa lugar, madasig nga may nakakilala sa suspetsado gani sa pagpatigayon sang manhunt operation, siya ang ila nga nadakpan sa sulod sang iya balay alas-5:45 kahapon sang hapon.
Si Castino ang ginhunong sa Binalbagan Municipal Police Station kun sa diin nag-ako ini nga pagpangawat ang ila motibo sa krimen.
Samtang gin-ako naman sang suspetsado ang krimen kag kaupod sini ang duha ka iban pa nga padayun pa nga ginalagas sang mga otoridad.
Pahayag ni Babor nga robbery-holdup ang motibo sa krimen kag hubog kuntani ang target sang mga suspetsado apang natabuan nga nagpanaog sa Ceres Bus si Lazaga.
Si Lazaga ang kaagahon na makapauli matapos magtambong sa birthday celebration sa Barangay 35, Bacolod City.
Matapos makita nga naga-isahanon, nagdesisyon ang tatlo nga ini ang sundan tubtob nakadangat sa crime scene.
Bangod nagbato ang manunudlo, ini ang ginpululihan buno sang mga suspetsado.
Madumduman nga sang masapwan ang bangkay ni Lazaga, yara pa sa paghinakop sini ang iya nga wallet apang wala na sang unod kag nadula man ang iya nga cellphone.
Apang wala naman makawat ang relo kag laptop sang biktima.
Si Castino, ang wala naman sang nauna nga record sa Binalbagan Municipal Police Station, kag padulong na kuntani sa Iloilo apang ini ang wala na makadayun bangod sa krimen.
