Ginserbe sang mga kapulisan ang warrant of arrest sa Top 2 Most Wanted Person sa Western Visayas subong pasado alas 6:00 ang takna sa gab-i sa Silay City Airport, Silay City, Negros Occidental.
Sa impormasyon nga nakuha sang Bombo News Team ginkilala kay Alyas Paulo, 20 anyos kag residente sang Barangay Granada, Bacolod City, nga isa sa mga naghimulos sa 16 anyos nga bata sang suspect nga nagpatay kay Nicus Balagosa.
Si Nicus, ang gintudlo sang mga naghimulos nga ila kaupod gani ini ang ginluthang-patay sang amay sa atubang mismo sang iya ginikanan, apang ang 16 anyos nga biktima mismo ang nagpahayag nga indi kalakip si Nicus sa mga nagtandog sa iya.
Sa interview sang Bombo Radyo Bacolod kay Police Lt. Col Antonio Benitez, Chief Investigation Unit sang Bacolod City Police Office, ginserbehan sang mga ini sang warrant of arrest ang nasambit nga persona kun sa diin ini ang Top 2 Most Wanted sa Western Visayas; Number 7 sa Bacolod City Police Office kag Number 1 naman sa Bacolod City Police Station 5.
Suno diri, ang ginserbe nga warrant of arrest sa kaso nga rape nga gin-issue ni Hon. Karen Joy Gaston, Presiding Judge sang RTC Branch 43, Bacolod City sang Oktubre 14, 2024.
Ginpahayag man ni Benitez nga ang kaso ang natabo sa area sang Bacolod City Police Station 5.
Ang kaso nga ginapangatubang ni Alyas Paulo ang wala sang piyansa bangud isa ini ka heinous crime.
Sa bahin naman sang Muntinlupa nagpanago ang nasambit nga persona kag malapit man duha ka bulan ang pagmonitor sa iya antes nadakpan.
Ginpahayag nga isa lamang ini ka pagpakita nga ang mga kapulisan ang nagatinguha nga madakpan ang mga Most Wanted Persons bisan diin pa ang mga ini magpanago.
Suno kay Benitez kahigayunan man ini nga madepensahan man sang suspetsado ang kaugalingon sini sa kaso nga ginpasaka batok sa iya kag mahatagan hustisya ang biktima sang rape.
Dugang pa nga ang pagkadakop sini ang makahatag man sang kasanagan kun ano gid man ang natabo nga nagresulta sa pagpatay kay Nicus Balagosa.
adumduman nga ang 16 anyos nga bata nga babayi sang suspect nga si Carlito ‘Dondon’ Tongho Jr. ang gina-alegar ginhimuslan sang 17 kag 19 anyos nga abyan ni Nicus.
Apang matapos makastiguhan ang duha ka suspetsado sa gina-alegar nga paghimulos kag wala na nakapakita, si Nicus ang ginsulong ni Tongho upod sa iya utod kag duha ka iban pa kun sa diin ginsulod sini sa kwarto ang biktima kag ginluthang sa atubang sang iya mga ginikanan.
