Nagpasalamat ang isa sa mga tag-iya sang balay nga nahul-ab ang atop matapos nga ini ang gin-agyan sang buhawi nga nanglaba ini sang natabo ang insidente.
Sa interview sang Bombo Radyo Bacolod kay Carolina Mahinay, nagapanglaba gid siya sang naglabay ang buhawi kun sa diin ang 18 ka atop sang ila balay ang nauklab.
Suno kay Mahinay, una niya gid nga ginpangita amo ang iya mga ido samtang una man ini nga bes nga nakaeksperyensya sang tuman ka baskog nga buhawi.
Naghapa pa ini bangud pamatyag niya pati siya ang dal-on sang hangin.
Nalipay man ini sang nakita ang iya nga itom nga ido nga wala nasamaran sa nagluntad nga buhawi.
Suno kay Mahinay, ginpangtipon nalang nila ang mga sin nga nauklab bangud indi naman nila ini mapuslan.
Ginpahayag man sini nga nagkala-ukab man ang portion sang hollow blocks sang ila balay samtang ang katre sini ang naguba man bangud sa buhawi.
Nagapasalamat man ini nga nanglaba siya sang nagluntad ang buhawi kag wala nagtulog sa ila nga kwarto bangud ini ang may dako nga damage sa bahin sang ila nga balay.
Nagdangat naman sa P100,000 ang ila nga nagasto sa ila balay kag kwarta pa sang iya iloy ang gingamit agud nga mapundar ini.
Suno kay Mahinay, sa Barangay Villamonte sila sang una apang ginrelocate lamang sa Barangay Vista Alegre, Bacolod.
14 naman ka balay ang naguba bangud sa buhawi kun sa diin siyam ang totally damage kag nalakip diri ang balay ni Mahinay.
