Duha na ka mga miyembro sang New People’s Army nga napatay sa engkwentro batok sa militar sa Barangay Oringao, ciudad sang Kabankalan sang Domingo sang aga ang naidentify kag naclaim na sang ila nga pamilya.
Suno kay NOCPPO spokesperson Police Capt. Judesses Catalogo, ang ikaduha nga bangkay ang ginclaim sang isa ka pamilya nga taga-Tayasan, Negros Oriental upod ang ila nga punong barangay.
Mismo ang iloy ang nag-identify sa iya nga bata nga si Junjun Callete, 42-anyos kag residente sang Barangay Tanlad, Tayasan, Negros Oriental.
Si Joemarie Calumba naman nga isa ka mangunguma nga tumandok sang Barangay Oringao, Kabankalan City ang nauna na nga ginclaim sang iya misis kahapon.
Suno sa iya nga asawa, ginpanginwala sini nga miyembro sang NPA si Joemarie.
Suno kay Catalogo, diretso sang misis ang statement apang ang pagabasehan diri ang impormasyon nga ginapagwa sang Philippine Army kag sang ila mismo kaupod sa hublag.
Ginalauman naman nga maidentify na ang nabilin nga isa ka bangkay.
Suno sa NOCPPO spokesperson, may naggwa nga initial report nga taga-Kabankalan man ini apang kinahanglan pa sang documentary requirements agud nga ini ang makumpirmar, ukon ang pag-identify man mismo sang mga locals.
Nagalaom naman si Catalogo nga makabulig ang mga tumandok ukon ang mga barangay officials bangud kilala sang mga ini ang ila mga kasimaryo.
