Ginpanginwala sang Imam sa Islamic community sa Barangay 31, Bacolod City nga pumuluyo kag kilala nila ang duha ka mga Muslim nga nadakop sa pagpasulod sang tatlo ka kilo nga suspected shabu sa balor nga P20.4 million sa Bredco port kahapon.
Madumduman nga nadakop kahapon sanday Aslanie Desomangcop Usman, residente sang Lopez Jaena St., Brgy. 31, Bacolod City kag Jalanie Mohammad Ambulo, residente sang Villa Angela Subdivision, Barangay Villamonte, Bacolod City kun sa diin nadiskuberan sang K-9 unit sang Philippine Coast Guard nga may iligal nga droga sa compartment sang ila salakyan.
Pahayag ni Monib Cali nga nakibot nalang ini sang makabati sang balita nga may gina-alegar residente sa Islamic Community ang nadakop maykaangtanan sa tuman ka dako nga balor sang iligal nga droga.
Paathag sini nga indi nila kilala ang mga suspetsado kag bisan ang Punong Barangay ang nakakilala sang tanan nga pumuluyo nga yara sa Islamic Center.
Suno kay Cali, madamo sang muslim sa syudad sang Bacolod nga indi nila kilala kag masami nga ginagamit man ang Islamic Center bilang address.
Aminado naman ini nga indi mapunggan ang iban nga muslim kun gamitun ang address sa ila nga mga IDs agud nga mahapos sila nga matumod sang mga kaangay nga Muslim enkaso nga kinahanglan.
Pahayag sini nga wala sang problema sa paggamit sang ila nga address apisar nga wala nagapuyo sa lugar kun maayo lang ang ginabuhat apang dako na nga problema kun ang nagagamit sang ila nga address ang nagabuhat sang iligal.
Pahayag sini nga madamo na nga beses nga may mga nagkaladakpan kag ang ila address ang gamit, nga nagatuga agud maumid ang bilog nga Islamic Center.
Panawagan sang Imam nga kun magpahimo gid man sang ID nga naka-address sa Islamic Center, indi na magbuhat pa sang malain bangod ang mga pumuluyo sa lugar ang nagapangabuhi man sang matawhay.
