Ginpahayag sang anay gobernador sa Negros Occidental nga nagakihanglan sang island wide scientific intervention agud nga masolusyunan ang problema sa Red-Striped Soft Scale Insect ukon Aclerda takahashii.
Sa interview sang Bombo Radyo Bacolod kay Former Governor Rafael “Lito” Coscolluela, indi lang masarangan sang isa ang pagsulosyon sa nasambit nga problema bangud kinahanglan nga bululigan na ini sang komunidad kag Local Government Units.
Suno kay Coscolluela nga dapat may mga experts nagikan sa UP Diliman kag iban pa nga government agencies nga makatuon sang tikang nga himuon agud nga mapatay kag matapna ang pagduging sang RSSI.
Suno diri, sa personal sini nga eksperyensya sa iya nga kampo nagabakal ini sang bulong agud nga ispray sa tubo agud nga mapatay ang nasambit nga insekto apang wala ini magtalab.
Ginpahayag man nga madasig ang paglapta sang mga ini bangud sa crawlers nga nagtapik sa bayo sang nagatrabaho sa kampo ukon sa mga patdan man.// Mahimo man nga ginpalid ini sang hangin padulong sa iban nga kampo sang tubo.
Nagakadapat na sa karun nga magbuligay ang tanan halin sa mga Barangay padulong sa mga banwa kag ciudad agud nga makadihon sang solusyon para matapna ang pagpanghalit sang RSSI.
Samtang natalana nga magahinun-anon ang sugar planters kaupod ang gobernador agud nga matumod kun kihanglan nagid man nga magdeklarar sang state of emergency sa probinsya bangud sa insect infestation.
