Nagdepensa ang Israel sa ginhimo nila nga airstrike sa Beirut, Lebanon.
Ang nasambit nga hitabo ang makabig nga pinakadako nga airstrike kun sa diin target nila ang headquarters sang Hezbollah.
Sa nasambit insidente ang anum ka building ang naguba kag may duha ka napatay kag ginkasamad sang kapin 80 ka mga tawo.
Ginpahayag sang Israel Defense Forces Spokesperson RAdm. Daniel Hagar nga ginhimo nila ang airstrike agud dalayon nga mapapas ang Hezbollah kag matawhay na nga mangabuhi ang ila nga pumuluyo.
Samtang, ginpadangat ni Israeli Prime Minister Benjamin Netanyahu sa bug-os nga kalibutan sa iya pag-atubang sa United Nation General Assembly sang Biyernes nga padayunon sang Israel ang pakig-away sa militante nga Hezbollah kag pagpapas sa Hamas sa Gaza strip tubtob nga makuha nila ang lubos nga kadalag-an ukon total victory.
Suno kay Netanyahu, may kinamatarong ang Israel nga i-eliminate ang pamahog kag agud mabalik ang ila nga mga pumuluyo nga hilway sa ila tagsa ka mga puluy-an gani ginahimo nila ang mga pag-atake.
Ginpanindugan man sang Israeli Prime Minister nga ila ipadayunon ang pagdegrade sa militante nga Hezbollah sa Lebanon tubtob sa malab-ot nila ang tanan nila nga mga tinutuyo.
Gintudlo man ni Netanyahu ang Iran nga nangin destabilizing force sa Middle east region bangud sa pagsuporta sini sa Hezbollah kag Hamas.
Kaangot sini, ginpaandaman ni Netanyahu ang Iran nga magabalos sila kun magalunsyar ini sang strike batok sa Israel.
