BACOLOD CITY — Ginpasiguro sang bag-o nga pinuno sang Provincial Environment and Natural Resources Office sang Negros Occidental nga hatagan sang atensyon ang problema nga nagtuhaw sa Northern Negros Natural Park.
Suno kay Forester Edgardo Rostata, paga-reviewhon pa sang provincial office kun ano ang maayo nga himuon sa mga structures nga ginpatukod sa sulod sang natural park matapos nga ginserbehan ang mga ini sang Cease and Desist Order sang tinalikdan nga tinuig.
Kun anuman suno sa iya ang mangin resulta sini, iga-presentar ini sa Protected Area Management Board sang NNNP agud nga maaprubahan kag mahibaluan man sang legal division kun ano ang nagakabagay nga tikang sa mga illegal structures.
Una diri, ginpatigayon na sang DENR NIR ang survey sa NNNP agud matumod kun sanday sin-o ang dapat nga makaistar diri kag kun sin-o ang dapat nga magbayad sang multa bangud sa pag-okupar sa natural park.
Nahibaluan nga ang pagsolbar sa isyu sa NNNP ang marching order ni Director Al Orolfo sa bag-o nga PENRO head, bulos kay Andres Untal.
