Ginreklamo sang mga pumuluyo sang Hda Jovillanos, Brgy Cansilayan, banwa sang Murcia, ang tuman ka baho kag paghigko sang suba kun sa diin ginapa-ilig ang higko sang manok halin sa Ta-ala Farms.
Sa interview sang Bombo Radyo kay Purok Chairman Benjie Nangan, masobra isa ka tuig na nila nga ginareklamo ang baho halin sa poultry farm apang tubtob sa karun wala pa nasolusyonan.
Suno diri, may higko sang manok nga ginakuha pa halin sa Brgy Mansilingan, Bacolod City kag didto pa ginadala.
May yara man sang dryer para sa higko sang manok apang ginapa-ilig pa sa suba ang mga iti.
Kun kaisa indi lang higko ang ginahaboy sa suba apang may yara pa kun kaisa sang patay nga manok.
Dugang pa ni Nangan, kun kaagahon ukon kagab-ihon lamang sila nagapa-ilig sang higko kag kun naga-ulan kun san-o makusog ang pag-ilig sang tubig.
Pahayag ni Nangan, nabudlayan na sila bangod indi na sila maayo makagamit sang suba nga ginalabhan, ginkuhaan sang isda kag ginapaligoan apang sa karun may may iti na ang tubig kag kaangay nga malapuyot kun lantawon.
Nagapanawagan ini sa karun nga masolusyonan ang baho kag kun tani indi na pag-ihaboy ang higko sang manok sa suba.
