Ginpasalig sang pinuno sa Negros Occidental Provincial Veterinary Office nga wala nagasulubra kag wala man nagakulang ang supply sang itlog sa Negros Occidental.
Ini kasunod sang surplus sa supply sang itlog sa Luzon kun sa diin ginpanawagan na nga damuon ang pagkaon sang itlog.
Sa interview sang Bombo Radyo Bacolod kay Negros Occidental Provincial Veterinarian Dr. Placida Lemana, bangod sa executive order ni Negros Occidental Provincial Governor Eugenio Jose “Bong” Lacson nga nagadumili sa pagsulod sang supply sang manok, itlog kag iban pa nga bird product gikan sa Luzon kag Mindanao bangod bird flu, gani wala man nagsulobra ang supply sang itlog sa probinsya.
Suno kay Lemana, sa paghinun-anon sini sa pamunuan sang Negros Occidental Layers Association (NOLA) yara sa 1 million ka mga itlog ang maproduce kada adlaw, samtang nagadalagan naman sa 800,000 tubtob 1 million ang ginakunsumo sa probinsya kada adlaw.
Dugang pa sini nga indi man kulangon ang supply bangod magluwas sa nagikan sa probinsya, may nagasulod man nga supply gikan sa Cebu kag Iloilo.
Paathag ni Lemana nga bird flu free ang bilog nga Visayas gani libre lamang sila nga makapatabok sang mga produkto indi kaangay sa Luzon kag Mindanao nga tubtob sa karun may mga nagakareport pa nga kaso.
Ginpahayag sang NOLA nga nagnubo ang farmgate price sang itlog.
Apang sa karun, natalupangdan man sang mga ini nga kun may pagbag-o sa presyo sa merkado, tuman gid lamang ka gamay.
Sa karun ang average nga presyo sang itlog ang nagarange sa P8 sa small, P9 ang medium, P9:50 sa large kag P10 ang extra-large, apang aminado man si Lemana nga nagalainlain ang presyuhanay sa kada banwa ukon ciudad.
