Padayun pa sa gihapon nga ginahulat ang pagbaylo sang schedule sa pagbantay sa Negros Occidental District Jail (NODJ) agud nga mabuslan na kag mapadayun ang imbestigasyon sa lima ka mga jail guards nga on-duty sang nakapalagyo ang lima ka mga priso sang Hunyo.
Suno kay Jail Chief Inspector Anthony Jairus Dogelio, spokesperson sang Bureau of Jail Management and Penology (BJMP) Region 6, madumduman nga sa lima nga nagpalagyo, duha na ang napatay, isa ang nadakop samtang duha naman ang nabilin nga ginapangita nga sanday Alejandro Montoya kag Francisco Epogon.
Under investigation naman ang lima ka mga jail guard kasubong man ang jail warden nga si Jail Superintendent Pricel Arevalo.
Suno kay Dogelio, ginahulat nalang nila ang pagbaylo sang guardya.
Ang changing of guards nga cycle ang natalana nga patigayunon subong nga semana.
Ginpakigbahin sini nga may plano na ang regional office natuhoy sa mga jail guards kag sa jail warden.
Ginalantaw nga nadugayan ang pagbaylo sang schedule sa pagbantay, bangod natalana pa lang nga magtakop ang 21 ka adlaw nga quarantine days.
Samtang nagaduty gihapon ang mga jail guard kag ang jail warden naman ang yara sa floating status.
Ginpakigbahin man sini nga nagapadayon gihapon sa paglibot ang tracking team sa pagpangita sa duha pa ka nabilin nga pugante.
Nagapati naman si Dogelio nga wala pa ang mga ini makagwa sa Negros Occidental kag ginatago lang sang ila mga himata ukon abyan.
Suno diri, mabudlay nga madakop ang mga pugante bangod haloson lang ang mga ini maggwa kun adlaw.
Gugang pa sini nga masami nga nagagwa ang mga pugante kun magdulom na.
Panawagan ni Dogelio sa mga pumuluyo nga indi maghatag sang sala nga impormasyon.
Nagapabilin naman sa P15,000 ang reward sa makatudlo sa duha.
