Nagapadayun ang imbestigasyon sa mga on-duty nga mga jail guards kalakip na ang jail warden sang Negros Occidental District Jail (NODJ) kasunod sang pagpalagyo sang lima ka priso.
Sa karun duha na sa mga pugante ang napatay nga sanday Danilo kag Marvin Celeste, isa ang liwat nga nadakpan nga si Daniel Tamon kag duha ang padayun pa nga ginapangita nga sanday Alejandro Montoya kag ang gina-alegar lider sang Epogon Robbery Group nga si Francisco Epogon.
Suno kay Atty. Jairus Anthony Dogelio, tagpamaba sa Bureau of Jail Management and Penology (BJMP) Region 6, nagapadayun man ang ila imbestigasyon sa Jail Warden kag sa lima ka mga Jail Guard nga On-duty sang nagpalagyo ang lima ka priso.
Sa karun nagapabilin gihapon nga nagaduty ang mga Jail Guards sa NODJ bangod wala pa sang sarang maibulos nga personnel.
Pahayag sini nga kun magpadala sang personnel gikan sa luwas sang iban nga bahin sang Western Visayas, magakinahanglan pa ang mga ini nga magpaidalum sa quarantine.
Suno kay Dogelio, wala pa sang mga ini ginbawi ang service firearm sang mga personnel bangod onprocess pa ang investigation.
Apang sa tion naman nga mapamatud-an nga guilty ang mga personnel, sarang man ang mga ini nga mapasakaan sang kaso nga “neglect of duty”.
Dako man ang posibilidad nga mapahalin sa pwesto ang mga personnel.
Samtang suno kay Dogelio, nagapadayun man ang manhunt operation sang BJMP kag mga kapulisan batok kanday Montoya kag Epogon.
Samtang ginbag-o naman sang BJMP Region 6 ang balor sang reward sa makatudlo nga pumuluyo sa mga pugante.
Kun sa nakaligad P10,000 ang reward offer sa makatudlo sa mga pugante, sa karun ginpasaka na ini sa P15,000.
Ini ang ginpasaka agud nga indi na magduha-duha kag magkahadlok ang mga pumuluyo sa pagtudlo bangod ang pugante ang mas makahatag sang peligro sa mga pumuluyo.
