Priso ang isa ka Jail Officer matapos iya nga napatay ang manugbantay sang manokan sa Purok Bomba, Brgy. Salvacion, banwa sang Murcia, Sabado sang gab-i.
Sa interview sang Bombo Radyo kay Police Major Robert Dejucos, hepe sang Murcia Municipal Police Station, natandog sang biktima nga si Louie Gora ang hose nga nagakonektar sa ginakuhaan sang tubig nanday Jail Officer Raven Gayle Severeno nga gintunaan sang ila nga pagkomprontahanay.
Sang ginakay-o ni Severeno ang tubo sang tubig, gulpi lang naghambal si Gora nga buligan niya ini apang pagtangla sang jail officer, nakataya na ang isa ka home made shot gun sa iya gani gilayon man siya nga nagkuha sang pusil kag gintiro ang biktima sang apat ka beses nga gintunaan sang iya nga kamatayon.
Suno kay Dejucos, boluntaryo nga nagsungka ang suspetsado sa police station kag ginpahayag sini nga self-defense ang iya nga ginhimo.
Nahibalu-an man nga ang biktima ang yara sa impluwensya sang makahulubog nga ilimnun bangud may nakit-an nga botilya sang beer sa manokan nga iya ginabantayan.
Narecover sa crime scene ang sulpak nga ginapanag-iyahan sang biktima.
Sa karun, yara san kustodiya sang Murcia Police Station si Severeno nga naka-assign sa BJMP Iloilo kag nakatalana ini nga pasakaan sang kaso nga homicide.
