Kasunod sang natabo nga pagpalagyo sang lima ka mga inmates sa Negros Occidental District Jail (NODJ) kaina sang kaagahon, gilayon nga ginrelieve ang jail warden nga si Jail Chief Inspector Pricel Arevalo kag ini ang ginbuslan ni Jail Chief Inspector Abner Zamora.
Sa interview sang Bombo Radyo Bacolod kay Jail Chief Inspector Jairus Anthony Dogelio, tagpamaba sang Bureau of Jail Management and Penology (BJMP) Region 6, ginpahayag man sini nga si Zamora ang nagikan man sa NODJ apang nag-eskwela ini sang isa ka tuig sa Public Safety Officers Senior Executive Course(PSOSEC) antes nagbalik sa NODJ.
Ginpahayag man sini nga indi maayo ang natabo kaina sang aga gani nagmando ang regional director sang BJMP 6 nga si Jail Chief Supt. Arnold Buenacosa sa tanan nga district jails sa region 6 nga mangin alerto bangud sa natabo nga pagpalagyo sang PDLs sa probinsya sang Negros Occidental.
Suno kay Dogelio, nagpadala na ang BJMP Region 6 sang imbestigador sa NODJ agud nga mag-imbestigar sa natabo kasubong man pagaimbestigaran ang mga jail officers nga nakaduty sang nagpalagyo ang mga PDLs.
Ginpahayag man sini nga indi man kadali-dali relieve sang mga personnel sa karun bangud sa community restrictions sa COVID-19.
Gin-athag man sini nga marelieve ang mga personnel nga nakaduty apang nagapangita pa sang igabulos.
