Madamol nga ulan ang naeksperyensyahan sa pila ka bahin sang Japan halin kahapon bangud sa Tropical Storm Mawar nga nagikan diri sa Pilipinas.
Nag-abiso ang mga otoridad sa masobra isa ka milyon ka mga pumuluyo nga mag-evacuate, madamo nga mga flights kag iban pa nga transport ang nacancel, samtang nadulaan naman sang supply sang kuryente ang linibo ka mga pamalay.
Suno sa Fire and Disaster Management Agency, isa ka persona ang nakaangkon sang serious injuries kag pito ang nag-agom sang minor injuries sa southern prefecture sang Okinawa kahapon sang hapon.
Suno sa FDMA, malapit 1.3 million ka mga pumuluyo sa bilog nga pungsod ang gin-abisuhan nga mag-evacuate kag pinakamadamo sa mga ini ang yara sa area sang western Honshu kaangay sang Wakayama prefecture.
Suno sa Transport Ministry, masobra 300 ka mga flights ang nacancel Biyernes sang udto, kaupod ang 52 ka ferry services.
Gin-untat ang Shinkansen bullet train service nagikan sa Tokyo padulong sa Osaka, western Japan, kag sa iban nga parte sang pungsod.
Malapit 8,900 naman ka households ang nag-eksperyensya sang power blackout.
Suno sa Toyota Motor, ginsuspend nila ang trabaho sa duha ka factories sa Aichi prefecture sa central Japan agud masiguro nga safe ang mga empleyado.
