Indi mahapos ang mag-istar sa isa ka daku nga airport bangod sa gahod sang mga eroplano nga nagatake-off kag nagahugpa, apang isa ka Japanese farmer ang nagapabilin sa pag-istar diri.
Naka-andan na sang pamilya ni Takao Shito nga magpadako sang mga utanun sa isa lang ka farm sa sulod sang malawig nga tinuig.
Ang lolo ni Shito ang isa ka farmer kasubong man sa amay sini gani ginamana nya man ang pagkafarmer apang daku ang kinalain sini sa mga ninuno.
Ang Shito farm ang anay kabahin ang village nga ginabug-usan sang 30 ka pamilya nga may-yara sang open fields, apang sa karun, ini nalang ang nabilin sa tunga sang Narita Airport, ang ikaduwa sa pinakadako nga airport sa Japan.
Nagalupad sa ibabaw lang sang farm ang mga eroplano sa bilog nga adlaw samtang ang paagi lang sini agud nga makagwa kag sulod sa kaugalingon nga farm ang pinaagi sa underground tunnel.
Kadamuan ang posible nga mas gustuhon nga maghalin sa lugar apang lain si Takao Shito.
Ginapakigbato sini ang farm sa sulod na sang duwa ka dekada kag nagapamalibad apisar sa offer nga $1.7 million para sa duta.
Pahayag ni Shito nga magapabilin ini sa pag-istar sa farm nga ginapanag-iyahan pa sang lolo, amay kag kanunu-an sini.
Nahibaluan nga ang amay ni Takao nga si Toichi ang isa man sa mga farmer nga hugot nagapamalibad sa pagpatukod sang gobyerno sang Narita Airport sadtong 1970.
Kalabanan naman sa mga farmer nga anay nagapuyo sa lugar ang napilit sa pagbaligya sang ila nga mga duta pinaagi sa kwarta apang nagapanindugan si Toichi apisar sa balor nga gina-offer.
Ang ginapatihan sang amay naman ang naka-andan ni Takao humalin sang gamay gani sang nagtaliwan ang amay sa edad nga 84, ginbayaan sini ang negosyo nga restaurant agud nga magbalik sa farm kag ipadayun ang pakipagbato.
Segi-segi naman nga nagaka-imbulbar si Takao sa mga pakipag-away legal sa pagpugong sa mga otoridad nga mapahalin kag makuha ang ginapanag-iyahan nga duta.
Makapoy man ini, wala sang plano nga mag-untat sa Takao.
Ang padayun sini nga pagpangabudlay ang nangin simbolo sang civil rights kag nagtuga man sang ginatos nga mga bulontaryo kag aktibista ang nagarally para sa pagsuporta diri sa sulod sa pila naman ka tuig.
Tubtob sa karun, si Takao Shito ang padayun gihapon nga naga-atinder sa organic farm sini sa tunga sang Narita Airport kag nagabaligya sang produkto sa malab-ot 400 ka mga kustomer.
Wala naman sang negatibo nga epekto diri ang COVID-19 pandemic kag naghatag pa ini sang mas matawhay nga pagpangabuhi.
Suno kay Takao, ang pagbuhin sang nagalupad nga eroplano ang naghatag diri sang mas matinlo nga hangin kag mas malinong nga puluy-an.
