Nagtaliwan na sa edad nga 90-anyos ang voice actress nga naghatag sang kabuhi sa karakter sang robotic cat nga si Doraemon sa Japanese anime.
Si Nobuyo Oyama ang napatay sang nagligad pa nga Septyembre 29 bangud sa katigulangon.
Nagpangayo man sang pasaylo ang “Actors 7” agency sa delay nga statement sa iya kamatayon kag nagpasalamat man sa tanan nga nagpalangga kay Oyama.
May ginpatigayon man nga pribado nga haya nga ginkadtuan sang mga himata kag abyan sang nagtaliwan.
Ang “Doraemon” television show ang gin-air humalin sang 1979 tubtob sang 2005 kag isa sa tatlo ka shows sa larger Doraemon franchise nga nangin popular sa regional markets kalakip na sa Hong Kong, Vietnam, kag Pilipinas.
Kalakip man sa franchise nga ini ang animated films, video games, music albums kag manga series.
Si Oyama ang nabun-ag sa Tokyo, Japan kag antes ini nangin boses ni Doraemon, nangin kabahin man siya sang puppet show nga “Boo Foo Woo” nga popular man sa Japan humalin sang 1960 tubtob sang 1967.
Sang Hulyo, matandaan nga nagtaliwan man ang 88-anyos voice actor nga si Noriko Ohara nga amo naman ang boses sa likod ni Nobita sa Doraemon.
