Nagpanawagan kay Presidente Rodrigo Duterte ang pinuno sang Metro Bacolod Mansilingan Drivers Association (MBMDA) nga aprubahan ang pagpanubo sang physical distancing rule sa public utility vehicles agud nga madugangan man ang ila pasahero.
Sa interview sang Bombo Radyo kay Rudy Agsam Catedral, ginpahayag sini nga ang pagbuhin sang distansya sa jeep ang dako nga bulig para sa mga driver bangud sa karun nagadangat lang sa P200 ang mapauli nila sa ila pamilya, indi kaangay sang antes ang pandemya nga makapauli sila sang P500-P700 tagsa ka adlaw.
Una naman nga ginpahayag ni Catedral nga ginasuportahan sini ang ginaduso sang Department of Tourism nga pagbuhin sang distansya sa mga Public Utility Jeepney sa 0.75 meter halin sa one meter.
Samtang nagpanawagan man ini nga dapat ang mga assistance kaangay sang Pantawid Pasada ang ihatag nalang direkta sa mga driver bangud kalabanan, operator ang nagapulos kag wala ginahatagan ang mga driver.
Sa pihak nga bahin, ginpasalamatan man sini ang nagahatag sa ila sang ayuda kaangay sang mga pamatan-on nga naghatag man sa ila ilabi na sa karun nga apektado sila sang ginpaidalom ang syudad sa Modified Enhanced Community Quarantine (MECQ).
