Ginpahayag sang live-in partner ni Jenelyn Manto, suspetsado sa pagluthang kay Philippine Drug Enforcement Agency (PDEA) agent Jason Yayola sang Oktobre 5 sa Barangay Cabug, nga ginsulong ang mga ini sang mga PDEA agents sang gab-i sa kaangay nga adlaw.
Sa exclusive interview sang Bombo Radyo Bacolod kay Joemie Besa, criminology student, sang natabo ang pagpangluthang, nagapuyo pa ang mga ini sa balay sang ginikanan ni Manto sa Barangay 16.
Paathag sini nga ginharras sila gani kasunod sini, ginpakamaayo nalang sang duha nga magbalik sa ila balay sa Barangay 2.
Suno kay Besa, alas-11:00 sang gab-i nagtawag sa ila ang live in partner sang boss ni Manto nga si Chris nga isa man ka PDEA agent, nga nagapahayag nga luyag sini makasugilanon ang criminology student.
Apang paggwa ni Manto, yara naman sa gwa sang ila balay sa Barangay 16 ang kapin siyam ka mga lalaki nga gilayon nga nagsulod sa ila nga balay.
Wala man ang mga ini nagpakilala nga katapo sang PDEA, apang nakilala ini ni Manto bangod masami ang mga ini nga nagabisita sa ila opisina.
Pila sa mga ginkilala ni Manto amo sanday Chris, JR, Alvin kag Ace, apang wala ini nakakilala sa matuod nga mga pangalan sang mga lalaki, bangod masami lain nga pangalan ang gamit sang mga ini bilang agent sang PDEA.
Dugang pa ni Besa nga bisan kay Jason Yayola, alyas Yayo lang ang pagkakilala diri ni Manto.
Magluwas nga wala nagpakilala nga PDEA agents, wala man ang mga ini sang search warrant nga suno sa criminology student nga indi nagakaigo.
Pahayag ni Besa nga hinali nalang nga ginkuha sa iya ni alyas Chris ang iya nga cellphone kag ginpangbukad ang mga messages sini kasubong man ang call logs.
Panindugan man sini nga wala man sang nakita nga indi amo ang PDEA agent sa iya cellphone bangod wala man diri sang kamalamalahan.
Paathag ni Besa nga manug-pulis man ini gani nakahibalo siya nga indi husto ang ginbuhat sang mga PDEA agents, apang wala na sila sang nahimo kay hinali nalang ang mga ini nga nagsulod sa ila balay.
Ginhambalan pa ini sang agent nga igalampos ang iya nga cellphone kun indi nya ini pahanugutan sa pagbukad.
Suno kay Besa, kun luyag sang mga ini nga mag-imbistiga, mahimo man ang mga ini nga makatawag sang Barangay ukon magpa-upod sa pulis.
Ginkulbaan pa ini sang marealisar nga PDEA agents ang nagharras sa ila bangod sa kahangawa nga mahimo sila ang plantedan sang ebidensya.
Ginpamangkot man sa ila kun sa diin ang salakyan sang iya amay nga gina-alegar get-away vehicle sang gunman.
Ginalantaw sang live-in partner ni Jenelyn Manto nga kaangay nga daw gina frame up ang mga ini sa krimen nga wala sila sang kahilabtanan.
Suno sa criminology student, kasunod sang insidente, nakabati naman ang mga ini sang mga tawo sa palibot nga nagapahayag nga daw ginabantayan ang mga ini sang PDEA.
Ginakatingala naman ini ni Besa bangod wala man sila sang sala nga nahimo.
Ginpakigbahin sini nga sang adlaw nga nagluntad ang insidente, yara lang ini sa balay sa Barangay 2 bangod may online class ini, samtang nakabatun lang ini sang text message gikan sa katrabaho ni Mantos nga papauli na ini kag nakitext lang bangod lowbat ang cellphone.
Samtang panindugan ni Besa nga indi man nila kilala si Romulo Jamantoc nga nadakop sa drug buybust operation sang PDEA sadtong Pebrero 2.
Gina-alegar nga malapit nila nga abyan ni Salgado ang drug personality kag ginapahayag nga nagbalos ang mga ini kay Yayola.
Natingala naman si Besa kun paano niya nangin close friend si Jamantoc kun indi nya man ini kilala.
Ginapanindugan man ni Besa nga wala man ini paagi sa pagcontact kay Patrolman Jake Salgado bangod wala siya sang numero diri kag nakablock man ini sa iya nga facebook messenger.
Paathag sang criminology student nga Setyembre 14 pa sang ginblock sini ang abyan bangod masami nga nagapangakig si Manto bangod indi sini gusto nga mag-upod diri si Besa.
Ini bangod masami sila sadto nga naga-inom nga gina-awayan nila sang iya partner.
Dugang pa ni Besa nga sa ulihi sini nga pagkahibalo nagaduty pa si Salgado sa Jaro, Iloilo kag wala ini nakahibalo kun san-o nagapauli sa Barangay Singcang-Airport ang abyan.
Wala man ini nakahibalo nga nasuspende si Salgado, kag nakabalo lang ini sang ginsugid sa iya ni P/Maj Ritchie Gohee, ang station commander sa Bacolod Police Station 9 nga nasuspende ang abyan sumugod sang Oktobre 1.
