BACOLOD CITY — Nagkaon sang Pinoy bulalo si IBF junior bantamweight champion Jerwin Ancajas antes ang iya hampang, Domingo sang udto.
Sa exclusive interview sang Bombo Radyo, ginpahayag ni WBO international minimum weight champion Mark Anthony Barriga nga kabahin sang pagpakondisyon ni Ancajas ang pagkaon sang bulalo.
Si Barriga ang kaupod ni Ancajas sa Texas kag siya ang nagapasiguro nga maayo ang ginakaon sini.
Pagbugtaw sang boksidor, nagwarm-up ini antes nagkaon sang bulalo nga iya paborito.
Nahisayran nagikan kay Barriga nga sila man mismo ang nagaluto sang ila pagkaon agud masiguro nga Pinoy food ang makaon ni Ancajas antes ang US debut bout.
Pagkatapos sang pamahaw, ginbilin nila si Pretty Boy sa iya hulot agud nga makarelax kag indi madisturbo sang madamo nga tawo.
Sanday Barriga kag Ancajas ang dungan nga nagdako sa Panabo City, Davao del Norte kag magkaupod sa ila mga hampang sang una.
Si Barriga ang nagsabak man sa 2012 Olympics nga ginpatigayon sa London.
