Arestado ang isa ka job order casual sang Silay City government kag ang ginatudlo nga spotter sini sa drug buybust operation nga ginpatigayon sang Silay City Police Station sa Hacienda Culahao, Barangay E. Lopez sa nasambit nga ciudad.
Ginkilala ang mga naaresto nga sanday Gerald Caritavo Sr., 52 anyos, isa ka job order sang LGU sang Silay City, High Value Individual kag Gerald Caritavo Jr, lunsay mga residente sang nasambit nga lugar.
Nakuha sa ila paghinakop ang walo ka plastic sachets sang ginapatihan shabu nga nagabug-at sang 14 grams kag nagabalor sang P95,200.
Sa interview sang Bombo Radyo Bacolod kay Police Lt. Col. Mark Anthony Darroca, chief of police sang Silay City Police Station, ginwarningan na sini sadto si Caritavo Sr, nga mag-untat na sa pag-intra sa illegal nga buluhaton apang wala nagpamati.
Suno kay Darroca, ginpatigayon ang buybust operation matapos nga nagreport ang pamilya sang mga naaresto Silay City Police Station sa ginahimo sini kag naglain na ang pagginawi sini.
Suno diri, ang isa sa nadakpan ang job order kag nagatrabaho bilang watchman sa ila nga barangay.
Ang spotter ang mangatubang sang kaso nga paglapas sa section 56 in relation to section 5 sang RA 9165 ukon Comprehensive Dangerous Drugs Act of 2002 samtang ang job order ang mangatubang sang kaso nga paglapas sa section 5 kag section 11 sang RA 9165 ukon Comprehensive Dangerous Drugs Act of 2002.
Wala pa nakatuad ang mga ini kun sa diin nagakuha sang supply sang illegal nga druga apang nagpahayag ang mga ini nga ginadul-ong lamang sa ila sa Barangay E. Lopez sa nasambit nga ciudad.
