Ginatos ka mga job order casuals sa local government sang Isabela ang nagpatigayon sang rally sa atubang sang munisipyo kaina sang aga agud ipanawagan sa Sangguniang Bayan nga aprubahan na ang 2022 annual budget agud nga sila ang maswelduhan.
Sa interview sang Bombo Radyo Bacolod kay Benjamin Miranda, tagpamaba sang mga nagrally, ginahingyo nila nga aprubahan na sang mga konsehal ang annual budget.
Suno diri, dapat nga aprubahan na ang pondo bangud madugay na sila nga wala naswelduhan kag nahatag naman sang alkalde ang ginapangayo sang SB members sang banwa.
October 15, 2021 pa suno kay Miranda nakapatigayon sang budget hearing apang tubtob sa karun wala pa naaprubahan.
Nagapanawagan ang mga ini nga aprubahan na ang budget bangud kinahanglan nila nga maswelduhan bangud may yara man sila sang mga pamilya nga ginasuportahan.
Suno kay Miranda, masobra 300 ang JO sa banwa sang Isabela.
Sa interview sang Bombo Radyo kay Vice Mayor Renato Malabor Jr., wala naaprubahan ang pondo bisan bulan na sang Pebrero bangud wala nasumiter sang Office of the Municipal Mayor ang listahan sang mga pangalan sang mga job order nga may kontrata sa local government unit.
Sang nagpangayo ang Sangguniang Bayan sang listahan sang mga pangalan sang mga job order suno kay Malabor, nagsumiter lang ang Office of the Municipal Mayor sang numero sang mga JO apang wala sang kontrata.
Bangud nagpromisa man ang opisina ni Mayor Irene Montilla nga masumiter sang listahan sang kontrata sang nagpangayo ini sang supplemental budget para sa mga JO sa last quarter sang tuig 2021 nga wala nahatag tubtub subong, ginapangita sang mga konsehal suno kay Malabor ang listahan agud maaprubahan ang 2022 annual budget.
Sang last quarter suno sa presiding officer sang Sangguniang Bayan, nagtalana sang colatilla nga isumiter ang listahan apang tubtub subong, wala ini napasa sang opisina sang alkalde gani ginapangita sang mga konsehal.
Suno kay Malabor, indi ini pagpang-ipit sa administrasyon ni Montilla bangud obligasyon sang SB nga usisaon ang pondo antes aprubahan.
Sa tion nga masumiter na ang listahan sang job contract suno sa vice mayor, aprubahan gilayon sang SB ang annual budget.
Sa karon, ginabanta nga nagadangat sa 447 ang numero sang mga JO sa Isabela – mas mataas sangsa tinalikdan nga mga tinuig.
