Gin-athag sang Chief Administrative Officer sang Bureau of Internal Revenue (BIR) Region No. 12 nga indi empleyado sang ahensya kundi kliyente ang nagpositibo sa COVID-19.
Madumduman nga ginpaidalom sa lockdown ang BIR Region No. 12 kag Revenue District 77 sa Barangay Taculing, siyudad sang Bacolod kahapon matapos magtransaksyon diri ang isa ka kliyente nga positibo sa COVID-19 kahapon.
Ginkilala ang pasyente nga si Western Visayas Patient no. 685, isa ka 45 anyos nga lalaki nga residente sa banwa sang EB Magalona kag nakafacility quarantine ini suno sa data.
Ang pasyente ang isa ka Job Order employee sang Provincial Government sang Negros Occidental.
Sa interview sang Bombo Radyo kay Norma Bayoneta, ginpahayag sini nga may yara sang nagalapta nga mga istorya nga may yara sang empleyado sang BIR nga positibo sa virus gani iya gin-athag nga indi ini matuod.
Suno sa iya, ginpaidalum na sa istrikto nga 14 days home quarantine ang mga personnel sang BIR sa Region No. 12, Bacolod kag Victorias nga napalapitan sang job order casual kag ginschedule naman sa disinfection ang pasilidad.
Igapaidalum man sa RT-PCR test ang nasambit nga mga empleyado.
