Arestado ang isa ka Job Order Employee sang ciudad sang Talisay matapos nga madakpan sa ginpatigayon nga drug buybust operation kahapon.
Sa interview sang Bombo Radyo kay P/Maj. Jigger Gimeno, hepe sa Talisay City Police Station, ang suspetsado nga nadakpan ang nabilin sa top 10 sa watchlist sang ciudad.
Ang suspetsado ang ginkilala kay Hernando Posadas Jr. alyas JR Posadas, 38 anyos, may asawa, kag residente sa Hda. Carmen, Barangay Dos Hermanas, Talisay City, Negros Occidental, kag ginakunsiderar nga High Valued Individual (HVI).
Nahibaluan nga si Posadas ang anay drug surrenderee sa ciudad kag nagpangako nga indi na magbalik sa iligal nga buluhaton.
Nakuha sa paghinakop sang suspetsado ang isa ka P500 bill nga marked money, 10 ka heat-sealed plastic sachet sang ginahinalaan shabu kalakip na ang buybust item nga nagabug-at sang apat ka gramo kag may estimated value nga P27,200.
Nakuha man gikan diri ang isa ka pack sang sigarilyo kag balor P1,800 nga cash.
Ang mga narecover nga item ang gindala sa PNP Provincial crime laboratory office para sa eksaminasyon.
Ang suspetsado ang ginpaidalum naman sa check up sa Teresita Jalandoni Provincial Hospital sa Silay City antes nga ginhunong sa kustudiya sang Talisay City Police Station.
Si Posadas ang magapangatubang sang kaso nga pagbayolar sa Republic Act 9165 ukon ang comprehensive dangerous drugs act of 2002.
