Ginpahayag ni Bacolod City Administrator Em Ang, chief executive sang Emergency Operations Center nga ang Johnson and Johnson vaccine nga nag-abot sa Bacolod ang pagagamiton para sa mga senior citizens.
Sa interview sang Bombo Radyo kay Ang, sang Lunes, nakabaton ang ciudad sang 30,000 doses sang single dose COVID vaccine nagikan sa Johnson and Johnson; 18,700 doses sang Astrazeneca; kag 2,340 doses sang Pfizer vaccine.
Suno diri, ang Johnson and Johnson vaccine ang ginapreparar kag ginarekomendar sang ciudad para sa mga senior citizens agud indi sila malipat sang ila schedule sa ikaduha nga dose kag agud man ma-obserbar ang pagsulundan nga paglikaw sa mga senior citizens nga magwa sa ila mga puluy-an.
Sa karun nagdangat na sa 66,012 ang mga persona nga nabakunahan na batok sa COVID-19 sa Bacolod City kun sa diin 22,477 ang fully vaccinated.
Sa karun kabug-usan nga 88,489 na ang kabug-usan nga doses sang bakuna nga naadminister sa ciudad.
Nagpanawagan man si Ang sa mga pumuluyo nga likawan ang mass gathering ilabi na sa karun nga may nadiskubrehan nga kaso sang Delta variant sa Western Visayas.
Nag-apelar man ang mga alkalde suno sa iya nga irecall sang National Inter-Agency Task Force ang Resolutoon 125 nga nagapahanugot sa mga naga-edad lima ka tuig pasaka sa mga lugar nga napaidalum sa GCQ kag MGCQ.
Nagpanugyan man ini sa mga pumuluyo nga magsunod sa mga health protocols kag magkooperar agud matapos na ang pandemic.
