Regular na ang pagsinapol sang Joint Security Control Center sang Negros Occidental bilang preparasyon sa nagahilapit nga eleksyon sa Mayo 9.
Sa interview sang Bombo Radyo kay Police Lt. Abegael Donasco, spokesperson sang Negros Occidental Police Provincial Office, ang Joint Security Control Center ang ginalakipan sang Comelec bilang main body kag upod sini ang Philippine National Police kag Armed Forces of the Philippines.
Tinalikdan nga adlaw, nagpatigayon sang coordinating conference ang NOCPPO, provincial election supervisor, Philippine Army, Department of Education, electric cooperatives kag internet providers agud makahatag sang update sa preparasyon sa adlaw sang piniliay.
Suno kay Donasco, ginplastar sang NOCPPO ang security preparation sang mga kapulisan sa bilog nga probinsya.
Luyag sang kapulisan suno kay Donasco nga mapabilin ang kalinong kag katawhay antes kag matapos ang eleksyon.
Sa karon, nagapabilin nga 18 ang election hotspot areas sa Negros Occidental.
Apang gindula sini ang kahangawa sang mga Negrense bisan may apat ka LGUs nga ginakabig red area bangud pagpangaman lang ini sang PNP sa anuman nga malain nga matabo, santo sa previous incidents sa nasambit nga mga lugar.
