Ginpahayag sang tagpamaba sang Prime Electric Power nga sila ang magahulat lamang sang resulta sang plebisito para sa Joint Venture Agreement sa tunga sang Central Negros Electric Cooperative kag MORE Power bangud ang CENECO ang magapreparar kag magapatigayon sini.
Sa interview sang Bombo Radyo kay Jonathan Cabrera, ang electric cooperative amu ang magapatigayon sang plebisito kag sila ang mamangkot kun pabor ukon indi ang ila mga member-consumers sa JVA.
Suno kay Cabrero, ang ila lamang katungdanan sa plebisito amu ang paggasto para diri bangud sila ang nagpropose sini.
Nahibaluan nga bwas nga adlaw kag sa Domingo, magasugod na sa pagboto ang mga member-consumers kun pabor ang mga ini sa JVA.
Ang masunod nga petsa sa referrendum amu ang Hulyo 1 kag Hulyo 2 kag Hulyo 8 kag Hulyo 9.
Suno sa iya, importante nga dapat eligible voter ukon nakapangalan sa iya ang account sa CENECO antes magpadulong sa buluthuan agud magboto.
Sa isa ka balay, isa lamang ka persona ang sarang nga makavote kag dapat maayo ang ila standing.
Antes magpadulong sa eskwelahan, nagapanugyan ini nga tsekyaron anay ang masterlist sa barangay hall agud masiguro nga nalakip ang ila pangalan.
Samtang, nagapadayon naman ang CENECO sa pagtinlo sang listahan sang mga pangalan matapos may nagreklamo nga nagtaliwan na ang iya amay apang iya gihapon pangalan ang nalakip.
Suno kay Cabrero, ang eligible sini nga bata ang sarang nga mangin proxy apang dapat may authorization ini nga gina-notarized sang isa ka abogado.
