Ginpakigbahin sang First Runner Up sa Miss Bacolod Masskara 2025 ang iya paagi kun paano ini nakakuha sang confidence nga magpasakop sa pageant apisar anay introvert kag gina-bully.
Sa interview sang Bombo Radyo Bacolod kay Ysabella Visitacion Wuthrich, ini ang una nga kahigayunan nga siya ang nagpasakop sa pageant.
Si Ysabelle ang bata sang German Spanish nga amay kag pure Filipina nga iloy nga anay nangin first runner up man sa Masskara Festival.
Siya ang natawo abroad apang sa Pilipinas na nagdako.
Suno kay Ysabelle, sadto siya ang introvert gid kag mahuyugon sa mga nerdy things kag anime, rasun man nga nagkuha ini sang kurso nga animation.
Siya sa karun ang isa ka digital artist kag painter man, apang ini ang nagsulod man sa teatro.
Naka-eksperyensya man ini sang bullying sadto bangod siya ang may foreign blood kag englishera kag kaangay nga out of place sa iban nga mga estudyante.
Suno kay Ysabelle sang siya ang naga-eskwela sa college sa Manila, nagsulod ini bilang part-time model sang isa ka national brand.
Suno diri, apisar nga sadto mahuluyaon, napinsaran sini nga ang oportunidad ang tumalagsahon lamang kag malip-ot lang ang kabuhi gani gintinguhaan niya nga atubangon ang mga risgo.
Apang wala ini nagsulod sa pageantry tubtob nga nakatapos sa kolehiyo bangod para sa iya, matapos na sang kolehiyo ang best time sa pagsulod sa pageant world agud mas makafocus kag indi maapektuhan ang pag-eskwela.
Nag-audition ini sa Miss Bacolod Masskara sang 2022 apang wala mabatun.
Suno kay Ysabelle, wala ini sang plano nga magpasakop sa Miss Bacolod Masskara 2025, apang ini ang ginsuhestyon sa iya sang iya iloy.
Wala man ini ginpilit, apang suno sa iloy, nakitaan siya sini sang potensyal.
Ang iya experience sa teatro ang nakabulig man sa iya agud maanad sa crowd.
Ginkalimtan naman sini ang mga pagpangduhaduha sang yara na sa stage bangod indi sini gusto nga maghinulsol sa ulihi, sa baylo gin-enjoy lang sini ang moment.
Ginkakibot nalang sini san siya ang nakadaog sang pito ka mga corporate awards, nangin Miss Digital Media Awardee luwas pa sa titulo bilang First Runner Up sa Miss Bacolod Masskara 2025.
Ang iya mga adbokasiya ang nakasentro sa pagbulig sa mga Bacolodnon nga may potensyal kag talento apang wala lang nagakahatagan sang tyansa paagi sa pagpatigayon sang mga workshops kag iban pa; kasubong man ang iya Anti-Bullying advocacy.
