Gin-anggid sang isa ka pageant blogger ang “journey to the crown” ni Miss Universe Philippines 2020 Rabiya Mateo sa biblical story nga David and Goliath.
Sa interview sang Bombo Radyo Bacolod kay Norman Tinio, ginpahayag sini nga daw kaangay kay David si Mateo bangud nga apisar first timer ini sa national pageant kag nakasambuwa niya ang mga makabig nga Goliath ukon mga beterano na sa patag sang pageantry kaangay na lamang ni Miss Quezon City Michelle Gumabao, apang ginlutos sini ang 45 ka iban pa nga mga kandidata kag ginkuha ang pinakauna nga tigulo bilang Miss Universe Philippines.
Nahibaluan nga nagsipak sang franchise ang Miss Universe nga sadto yara sa idalom sang Binibining Pilipinas Charities Inc.
Suno kay Tinio, isa sa mga ginapangita sang Miss Universe brand amo ang fresh faces kun sa diin luyag nila makita ang paglevel up sini tubtob sa international stage.
Nagapati man ang pageant blogger nga dako ang nabulig sang malawig nga lockdown agud nga mag-improve pa gid si Rabiya.
Suno sa iya, nag-agi sa maid-id nga learning journey si Mateo antes sini nakuha ang korona.
Dako man ang nangin maayo nga epekto sang pagka-manunudlo sini bangud mahapos nalang para sa iya agud nga ma-absorb ang mga new learnings nga makabulig gid sa iya.
Suno kay Tinio, 80% gid ang gin-improve sang Ilongga beauty queen antes ini nagpadulong sa Baguio City kun sa diin ginhiwat ang coronation night.
