Ginkumpirmar sang acting general manager sang Central Negros Electric Cooperative (CENECO) nga wala sang plebisito subong nga adlaw Hulyo 1 tubtob bwas, Hulyo 2.
Sa interview sang Bombo Radyo kay Atty. Arnel Lapore, padayon ang ila pangampanya kag pagpahibalo sa publiko angot sa Joint Venture Agreement sang CENECO kag Primelectric.
Suno diri, indi makaapekto para sa ila ang ginpagwa sang korte nga 72 hours nga temporary restraining order batok sa plebisito bangod ang CENECO kag Primelectric ang kinahanglan nga magsumiter sang ebidensya nga nakapatigayon sila sang information and education campaign angot sa plebisito.
Suno kay Lapore, sarang nila nga mapasa ang ginapangayo nga education campaign materials sa korte.
Kahapon ginkakas ni Bacolod RTC Branch 42 Judge Maria Lina Gonzaga ang temporary restraining order para sa plebisito subong nga adlaw Hulyo 1 kag bwas Hulyo 2.
Apang apisar sini, ginkumpirmar ni Lapore nga wala sang matabo nga plebisito subong kag bwas nga adlaw.
Suno diri, agud klaro para sa mga tawo, apisar nga ginkakas na ang TRO, mas maayo nga ipostpone na lang ang binotohay.
Dugang pa sini, magahingyo sila sa National Electrification Administration nga iextend ang schedule sang plebisito.
