Aminado ang bata ni Victorias City Councilor Virgie Adorio nga wala ini sang nauyatan nga litrato sang pagpaluhod kag pagpabisa sa iya ni mayoral candidate Javi Benitez.
Suno kay Pacifico ‘Jun’ Adorio, ara na sa karon ang tanan nga kinahanglanon sa iya nga abugado agud nga mapasaka ang kaso.
Nagpanindugan ini nga indi magkambyo ang iya statement bisan makapila pa ini ka beses interviewhon.
Suno kay Adorio, may pwersa ang paghambal sa iya ni Javi Benitez nga magluhod bisan malumanay ini nga sahi sang tawo.
Sa una nga paghambal ni Benitez nga maluhod, gintulok ini ni Adorio apang sang ginsulit sang mayoral candidate, nagsunod nalang ang tagreklamo bangud sa kahadlok niya sa iya kabuhi.
Aminado ini nga wala siya sang nasecure nga litrato sang pagpaluhod kag pagpabisa sa iya ni Benitez bangud ang nagpicture ang nagikan man sa kampo ni Benitez.
Halin sang nagpagwa sang statement si Adorio sa mga katapo sang media, wala pa gid nakacommunicate sa iya si Benitez.
Ginpanginwala man sini ang pahayag ni Benitez nga siya ang nagrequest sang meeting.
Suno diri, wala siya sang puder nga magrequest sang meeting bangud ordinaryo lang ini nga tawo, magluwas lamang sa pagka-campaign manager sang iya iloy nga si Victorias City Councilor Virgie Adorio.
Samtang, nagdepensa si Jun Adorio kun ngaa nadugayan ini antes maggwa sa publiko bisan Marso 28 pa natabo ang ginaalegar pagpaluhod kag pagpabisa sa iya ni Victorias mayoral candidate Javi Benitez.
Suno kay Adorio, nagbatyag ini sang depression kun sa diin nasapwan ini sang iya tinawo sang Marso 29 nga nagabura ang baba gani siya ang ginpasandig sa hiligdaan.
Pagkasunod nga adlaw, nagpakonsulta ini sa doktor agud nga malantaw ang kondisyon sang iya ikaayong-lawas.
Nagpangamuyo man ini sang Semana Santa kun siya ang magagwa sa publiko ukon indi gani nadugayan ini antes maghatag sang statement.
Apang bisan pila na ka semana ang nakalipas suno kay Adorio, madumduman niya ang kabug-usan nga natabo.
Ginapaabot naman sini ang bashing ukon pagpakamalaot sa iya matapos ang iya gintuad kag ini ang malaktan sang pulitika bangud election season subong.
Suno diri, nagasugid siya sang matuod kag indi niya luyag nga matabo sa iban nga pumuluyo sang Victorias kag indi niya man kinahanglan nga magpabakal bangud may ikasarang sila sa pangabuhi.
Nagsumpa man ini nga matuod ang tanan niya nga ginhambal kag wala sang binutig diri.
