Ginbasura sang ICC Appeals Chamber ang una nga ground sang apela ni anay President Rodrigo Duterte angot sa jurisdiction challenge.
Suno kay Presiding Judge Luz del Carmen Ibaniez Carranza, wala sang nakita nga “error” sa interpretasyon sang Articles 12 kag 127, gani unanimously ini nga ginbasura sang korte.
Ang duha ka articles ang nagatumod sa sakop sang jurisdiction sang ICC kag sa epekto sang pag-withdraw sang isa ka pungsod sa Rome Statute sa mga kaso nga nagapadayon.
Mas ginpabaskog pa sang Appeals Chamber sang International Criminal Court (ICC) sang Miyerkules, Abril 22 ang una nga desisyon nga nagapahayag nga may jurisdiction ang korte sa kaso ni anay President Rodrigo Duterte.
Ginbasura sang Appeals Chamber ang apela nga gin-file sang kampo ni Duterte kaangot sa nauna nga desisyon nga nagbasura sa ila nga pagbalibad sa gahum sang ICC sa kaso.
Sa hearing, ginpahayag sang korte nga ginabasura sang mayorya sa appeals chamber ang tanan nga apat ka grounds sang appeal.
Kadungan sini, wala naman ginatugutan ang request sang depensa para sa unconditional release ni Duterte.
