Ka Marcos, ginatudlo lider sang Central Negros 2, patay sa engkwentro sa Himamaylan City kaina sang aga

Patay ang isa ka miyembro sang New People’s Army (NPA) sa nagluntad nga engkwentro sa tunga sang 94th Infantry Battalion kag rebelde sa Sitio Cabagal, Brgy Buenavista, ciudad sang Himamaylan, kaina alas- 7:35 sang aga.

Ang napatay ang ginkilala nga si Ruben Tingal alias “Ka Marcos”, ginatudlo lider sang Central Negros 2

Sa interview sang Bombo Radyo kay Brigadier Gen Ted Dumusmog, 303rd Brigade commander, naglawig sa pulo ka minutos ang engkwentro sa ginabanta apat ukon lima ka NPA.

Natigayon nga napatay si “Ka Marcos” kag narekober diri ang m16 rifle kag mga subersibo nga dokumento.

Natukiban sang militar nga may presensya sang relebde nga grupo sa lugar matapos manugid ang mga residente nga nagapangilkil ang mga ini.