Kaangtanan sa illegal nga druga ang isa sa mga ginalantaw nga motibo sang Bacolod Police Station 7 sa pag-abduct kag pagsalvage kay Henry Paul Bombate kun sa diin ini ang ginwigit lamang sa kakahuyan sa Purok Guanzon, Barangay Mansilingan, Bacolod City sang Biyernes sang aga.
Madumduman nga nadiskubrehan sang mga otoridad sa ila ginpatigayon nga counter investigation nga antes paman ini ginwigit sa Barangay Mansilingan sang Biyernes, gin-abduct ini sa Barangay Banago suno sa amateur video nga naretrieve nila.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 7, si Bombate ang residente sang Barangay Banago kag nakaagi na priso sa Bureau of Jail Management and Penology bangud sa kaangtanan sa illegal nga druga.
Pagkatapos sini gwa sa prisuhan, siya ang nagbaligya sang isda sa Central Market.
Sa karun ila pa gina-imbestigahan ang background sang biktima kag indi pa sini makumpirmar ang impormasyon nga may utang ini sa Muslim nga nagabaligya sang shabu.
Isa sa mga motibo nga ila ginalantaw amu ang kaangtanan sa illegal nga druga bangud nga drug personality si Bombate kag posible may yara sang personal nga kontra.
May mga residente naman nga nakakita mismo sang pag-abduct kay Henry Paul Bombate apang bangud gin-abi nila nga pulis ukon katapo sang Philippine Drug Enforcement Agency ang mga ini kag nagserbi lamang sang warrant of arrest, wala sila nagbulig sang nagpangayo tabang ang biktima.
Suno kay Alyas Boy, nakit-an sini kun paano ginguyod kag ginpasulod si Bombate sang tatlo ka mga lalaki sa gray nga salakyan samtang isa naman ang nagadrive diri.
Suno sa iya, nakahood kag nakajacket ang mga suspetsado kag apisar nga nagasinggit sang tabang si Bombate, wala ini ginrespondehan sang mga residente bangud ila gin-abi nga mga pulis ukon PDEA ang nagkuha sa iya apisar nga wala sila naka-uniform.
Suno naman sa iban pa nga mga residente, nagasakay sa motorsiklo ang biktima kag nagpundo ini malapit sa isa ka barber shop sang may nagpalapit sa iya na isa ka persona nga nakahood nga itom kag ginsipit ini.
Gilayon naman nga nag-abot ang salakyan.
Magluwas sa salakyan, may motorsiklo pa nga nagasunod sa ila suno sa mga nakakita sa insidente.
