Wala ginadula sang Bacolod City Police Office ang posibilidad nga may kaangtanan sa illegal nga druga ang isa sa mga motibo sa pagpatay sa duha ka lalaki sa sulod mismo sang awto sa Purok Lampirong, Barangay 2 sang Martes sang gab-i.
Sa interview sang Bombo Radyo kay BCPO spokesperson Police Major Sherlock Gabana, ginatumod pa sang Police Station 2 ang motibo sa pagpatay kanday Dexter Brian Ursos sang Barangay 4, Bacolod City kag Fernando Mahipus sang Purok Boulevard, Barangay 14, Bacolod City bangud wala pa man nakapakig-angot sa kapulisan ang ila pamilay.
Apang isa sa mga anggulo suno kay Gabana, amo ang transaksyon sa illegal nga druga bangud may nakuha nga shabu sa sulod sang Mitsubishi Mirage nga ginasakyan sang duha.
Ginabanta nagabug-at sang isa ka gramo ang shabu, kag may narekober man nga drug paraphernalia, apat ka P1,000 bills nga lunsay peke, kag nanari-sari nga IDs, dokumento kag personal nga gamit.
Suno kay Gabana, padayon pa ang pagtipon sang Police Station 2 sang mga impormasyon nga makabulig agud masolbar ang krimen.
Naghingyo man ini sa mga residente nga may nahibaluan angot sa insidente nga makig-angot sa mga pulis agud nga makabulig sa imbestigasyon.
Aminado ang BCPO spokesperson nga wala pa natumod kun ano ang tuyo sang duha sa Purok Lampirong ilabi na nga madulom ang lugar.
Ginakabig naman sang BCPO nga isolated ang kaso kadungan sang pasalig nga ginahimo sang kapulisan ang tanan agud nga mangin safe ang ciudad kaangay sang pagpasanyog sang police presence.
Madumduman nga kaupod ni Mahipus ang apat ka tuig nga bata nga babayi apang wala ini ginhilabtan sang suspetsado.
Ginturn-over ang bata sa Balay Pasilungan sang Department of Social Services and Development.
