Bangod sa kakulangan sang tubig sa mga apektado nga lugar bangod sa epekto sang paglupok sang Bulkan Kanlaon kag natabo nga lahar flow, nag-augment sang mga water tanker kag purifier ang Kabankalan City Government.
Sa interview sang Bombo Radyo Bacolod kay Kabankalan City Mayor Benjie Miranda, pinaagi sa Disaster Risk Reduction and Management Office, sila ang nagdul-ong sang tubig sa mga evacuation centers sa banwa sang La Castellana.
Magluwas sa evacuation sites, ang water tanker nga naga-unod sang 20,000 liters ang nagdeliver man sang tubig sa duha ka Barangay nga tuman nga nahalitan.
Suno kay Miranda, sila ang nagdul-ong man sang foodpacks, medical kits kag kapin 20 mil nga boxes sang facemask.
Paathag sang alkalde nga sang maglaslas ang bagyo Odette ang Kabankalan City ang ginbaha man sang bulig kag kalakip ang banwa sang La Castellana sang nagbulig sa ila.
Nag-anunsyar man ang Our Lady of Salvation Parish sa Barangay Cabacungan, La Castellana, nga bukas ang ila simbahan sa pagbatun sang mga evacuees.
Sila ang sarang man nga macontact sa numero 09462608345.
Madumduman nga magluwas sa simbahan, ang Diocese of San Carlos, sa pagpanguna ni Bishop Gerardo Alminaza ang nagpatigayon man sang donation drive, in cash ukon in kind, agud ibulig sa mga apektado nga pumuluyo.
