Natumba ang isa ka poste sang kuryente matapos nga masagaidan sang cargo truck sa Lopez Jaena St., Barangay 31, Bacolod City kag bangud sini ang isa ang nalipungan kag isa naman ang napilasan.
Sa interview sang Bombo Radyo Bacolod kay Barangay Kagawad Shella Mae Togle Diaz sang Barangay 31, pasado alas 3:00 ang takna sa hapon nasagaidan sang nasambit nga truck ang poste sang kuryente.
Suno kay Diaz, ang nalipong kag ang napilasan ang nagapungko sa ila ginabaligyaan sang chicken joy kag ginpili man nga magpungko didto bangud mabugnaw.
Suno diri, naglabay ang cargo truck nasagaid sini ang nagasangyad nga kable sang kuryente nga nagresulta sa pagkatumba sang poste.
Gilayon man nga gin-secure sang personnel sang Negros Electric and Power Corporation ang area agud masiguro nga wala sang open wires.
Panawagan sini sa NEPC nga himuan sang tikang ang mga kable nga nagasangyad agud nga malikawan na nga may matabo nga kaangay nga insidente.
