Nagdangat sa 50 millimeters ang kadamulon sang ulan nga nagtupa sa Bacolod kahapon nga gintunaan sang pagsaka sang tubig sa pila ka bahin sang ciudad.
Ini suno kay Aaron Bais, head sang City Disaster Risk Reducation and Management Office (CDRRMO).
Ang kadamulon sang ulan suno kay Bais ang gintunaan sang mga pagbaha sa palibot sang ciudad kaangay sa Lacson St., Brgy. Mandalagan, Libertad, Magsaysay kag sa isa iban pa nga parte sang ciudad.
Apang suno kay Bais, ang na-eksperyensiyahan sang mga pumuluyo nga pagbinaha kahapon ang masami nga nagakatabo kun magbubo ang mabaskog nga ulan pagkatapos sang malawig nga tig-ilinit bangud nga nagakapuno ang mga drainage system sang basura.
Kagab-i, naglibot man sa ciudad ang CDRMMO kag aminado ini nga madamo ang nagapanawag sa ila nga nagapangayo sang bulig agud nga ma-rescue matapos nalubog sa baha ang ila panimalay.
