Kadungan sang Father’s Day, isa ka amay ang nadulaan sang kabuhi kag isa ang pilason matapos nga nabungguan sang wala pa natumod nga salakyan ang motorsiklo nga ila ginasakyan sa San Rafael, Dos Hermanas, Talisay City, Negros Occidental kagab-i kun sa diin gilayon nga nagpalagyo ang suspetsado.
Ginkilala ang napatay kay Ronnie Pastor, 39 anyos kag residente man sang nasambit nga syudad.
Si Pastor ang may angkas man nga isa ka persona nga ginkilala kay Alyas Tope nga nag-apok man kag nahulog sa taytay bangod sang aksidente, nga nag-angkon man sang injury kag ginabulong pa sa ospital.
Suno sa pamilya sang biktima, gikan sa ila nga balay ang biktima kag padulong kuntani sa sugar central.
Aminado ang pamilya nga nakainom ang biktima sang alkohol apang indi ini hubog.
Nagapanawagan ang pamilya sa nakabunggo nga magsungka na agud atubangon ang nahimo nga krimen.
Ang imbestigador mismo sa crime scene ang nagapahayag nga indi self inflicted ang insidente kundi nabungguan, bangod tuman ka patal ang impact sa mga biktima.
