Nagpanindugan ang barangay kagawad sa Barangay 35 diri sa ciudad sang Bacolod nga wala ini naka-absent sa mga session nga ginpatigayon sa barangay bangud wala man sang natabo nga session.
Madumduman nga matapos magfile sang kaso si Barangay Kagawad Ronnie Albao, ginpanindugan ni Punong Barangay Ruben James Miranda nga wala nagatambong sa session si Albao gani wala ini sang hawid nga minutes sang session.
Sa interview sang Bombo Radyo Bacolod kay Albao, dako nga pagbinutig ang ginpahayag sang punong barangay nga masami ini nga absent sa session.
Suno kay Albao, humalin sang Marso, Abril, Mayo kag Hunyo, wala sang natabo nga session kag may mga barangay kagawad nga makapamatuod sini.
Nangin palamangkutanon man sini nga wala masweldohan ang mga staff bangud sa pagkahibalo sini kabahin sila sang salaries and wages sang barangay.
Suno kay Albao, natingala man ini nga may honorarium ang barangay apang wala sang session.
Suno diri, ang Internal Revenue Allotment (IRA) ukon ang honorarium ang mahatag lang kun may yara sang natapos nga duha ka session ang barangay.
Ginpahayag man sini nga may mga minutes sang meeting sa petsa nga wala man sila nakapatigayon sang pamulong-pulong kag ginapasa ini sa accounting office kaupod ang mga petty cash, reimbursement kag mga agenda nga wala man naistoryahan.
Suno pa diri, nagpangayo man ini sang kopya sang mga minutes apang mismo ang punong barangay kag barangay treasurer ang nagpahayag sa atubang sang iban pa nga mga staff sang barangay nga wala sang mahatag bangud wala sang session.
Gin-ako man sini nga wala siya nagtuman sang ginapaubra sang punong barangay nga mangin miyembro sang contact tracing team sa idalom sang executive order bangud ginadepensahan na lamang sini ang iya kaugalingon sa posibilidad nga harassment nagikan sa pamilya sang Punong Barangay Ruben James Miranda.
Ginpahayag man sang Barangay Kagawad nga dapat antes magpagwa sang Executive Order ang Punong Barangay dapat may yara sang session apang wala ini natabo.
Gin-athag man sini nga wala siya nagpasaka sang kaso sa Ombudsman sa mga kasubong sini nga Barangay Kagawad baliskad sa pahayag sang Punong Barangay nga ginpasakaan niya ang mga ini sang kaso.
