Ginlabo sang 28 anyos nga lalaki ang Brgy Kagawad sang Brgy Tagukon, Kabankalan City, Neg. Occ, sang Huwebes, sang gab-i sa gina-alegar nga nagapalapta sang esturya ang kagawad nga nagagamit sang illegal nga druga ang suspek.
Ang biktima ang ginkilala nga si Ernie Gumban, 49 anyos, kasado, Brgy Kagawad sang Brgy Tagukon; samtang ang suspetsado naman amo si John Paul Malan, 28 anyos, wala sang trabaho, kag lunsay mga residente sang Prk Ipil Ipil, Brgy Tagukon.
Sa interview sang Bombo Radyo Bacolod kay Police Captain Sammy Gasataya, Deputy Chief of Police sang Kabankalan City Police Station, yara sa namatyan si Gumban sang hinali lang nag-abot si Malan nga may bitbit nga binangon kag gilayon nga ginlabo sa ulo ang kagawad.
Suno diri, nag-agom sang pilas sa ulo si Gumban nga gilayon gindala sa ospital kag sa karun luwas na sa katalagman.
Samtang, nalagyo naman si Malan apang nadakpan sa hot pursuit operation.
Pahayag ni Gasataya, ginalantaw nga ang rason sa pagpanglabo sang suspek amo nga ginpasibangdan sini si Gumban nga nagapalapta sang sturya nga siya ang nagagamit sang illegal nga druga.
Sa karun magapangutang si Malan sa kaso nga frustrated murder.
