Nagdangat sa masobra P290,000 ang balor sang halit nga ginbilin sang sunog nga nagluntad sa Prk Lampirong 2 sa Brgy 2, Bacolod City, kahapon ala-1:15 sang hapon.
Suno kay Fire Superintendent Jenny Mae Masip, fire marshal sang Bacolod City Fire Station, indi magnubo sa 29 ka balay ang nahalitan kun sa diin sa inisyal may yara sang 19 ka balay ang totally damaged samtang may siyam naman nga partially damaged.
Suno diri, nagdangat sa 2nd alarm ang status sang sunog bangod sa kalaparon sang nahalitan apang ala- 1:29 sang hapon nadeklarar na nga fire out.
Ang balay nga ginhalinan sang kalayo ginapanag-iyahan ni Rosalie Alburoto apang sang natabo ang insidente wala man sang tawo sa sulod sang balay.
Suno kay Masip, indi pa madeterminar kun ano ang gintunaan sang kalayo nga nagresulta sa sunog.
Samtang, wala naman sang may narekord nga napilasan ukon casualty magluwas na lamang sa duha ka ido nga na-injured apang natigayon man nga marescue.
Pahayag sini, 1,185 square meters ang kalaparon sang sunog kun sa diin kalabanan sa mga balay nga nahalitan ang human sa light materials kag ang balor sang halit nagdangat sa P296,200.
