Nagdangat na sa P60.41 million ang nahalitan sang dry spell sa humay kag mais sa Negros Island Region.
Sa pinakaulihi nga data nagdangat sa P41.96 million ang nahalitan sa humay samtang P18.45 million naman ang mais sa bug-os nga rehiyon bangud sa tuman kainit nga panahon.
Sa interview sang Bombo Radyo Bacolod kay Engr. Marion Joseph Tagle, pinuno sang Disaster Risk Reduction Management sang Department of Agriculture Negros Island Region, naga-eksperyensiya na sa karon sang “dry condition” ang probinsiya sang Negros Occidental.
Suno kay Tagle, sini nga Nobyembre may yara na sang dry spell sa Negros Occidental kun sa diin may below normal nga rainfall condition sa sulod sang tatlo ka bulan ukon may pagnubo sang 21 tubtob 60 porsyento ang nagatupa nga ulan.
Ginalantaw naman nga sumugod sa Disyembre, maga-eksperyensiya na sang drought ukon masobra 60 porsyento nga pagnubo sang nagatupa nga ulan sa Negros Occidental kaangay sang iban pa nga lugar sa Negros Island Region.
Dugang pa sini nga mahimo sa December tubtob sa March 2027 ang forecast nga pag-igo sang El Niño.
