Ginatipon sa karun sang provincial government sang Negros Occidental ang mga reports sa mga apektado sang pag-alburuto sang Bulkan Kanlaon sang Disyembre 9.
Suno kay Negros Occidental Provincial Administrator Atty. Rayfrando Diaz, sa tion nga maconsolidate na ang mga reports sa damage sa pananum, kasapatan kag iban pa maprioritize sang probinsya ang pagpagwa sang pondo nagikan sa quick response fund ini kasunod sang pagpaidalom sang probinsya sa state of calamity.
Apisar sang mga nag-alalabot na nga bulig, kinahanglan sang dugang nga ayuda para sa mga evacuees nga apektado sang paglupok sang Bulkan Kanlaon.
Samtang sang tinalikdan nga adlaw nagpaihaw naman sang baka kag ginpaluto sa La Castellana kitchen agud ipanagtag sa mga evacuees bangud ang nasambit nga banwa ang may pinakamadamo nga evacuees.
Indi man magnubo sa 500 liters sang ilimnon nga tubig ang ginapadala sang probinsya sa mga LGUs nga may yara sang evacuees bangud sa paglupok sang Bulkan Kanlaon.
Magluwas sini, padayon man nga nagapadala man sang food packs, hot meals kag iban pa nga bulig ang Kapitolyo.
Sa karun, nagapanguna nga kinahanglanon sang mga ini ang bastante nga suplay sang tubig, hygiene kits, sleeping kits, portalets, bulong sa ubo, kag tents.
Nagakinahanglan man sang gatas kag diapers para sa mga kabataan nga evacuees.
Samtang ang ciudad sang Bago ang nagdeklarar sang state of calamity apisar nga nakadeklarar na ang provincial government sang Negros Occidental bangud sa epekto sang paglupok sang Bulkan Kanlaon.
