Ginabanta nagdangat sa P100,000 ang halit nga gintuga matapos nga maupos ang apat ka mga balay sa sunog nga nagluntad sa Block 25, Phase 1, Fatima Village, Brgy. Rizal, ciudad sang San Carlos, sang Abril 1, 2022 sang hapon.
Sa interview sang Bombo Radyo Bacolod kay Fire Officer (FO) 2 Neil Bantillo, fire investigator, San Carlos City Fire Station, Alas 04:48 sang hapon sang Biyernes nakabaton sila sang tawag nagikan sa City Disaster Risk Reduction Management Office sang San Carlos City nga may yara sang nagluntad nga residential fire.
Nakumpirmar man sang mga ini nga may ara kag ang kalayo ang naghalin sa balay nga ginapanag-iyahan ni Angie C. Payona.
Suno kay Bantillo, nangin madasig ang paglaton sang kalayo bangud nagaikit-ikit kag kalabanan ang himo sa combustible materials ang mga pamalay kag nabudlayan ang mga bombero nga marespondehan ang sunog bangud sa magamay nga dalan.
Nalakip sa apat nga totally damaged nga balay ang iya ni Payona. May isa pa ka balay nga partially damaged naman.
Sa karon padayon pa ang imbestigasyon sang San Carlos Fire Station sa ginhalinan sang kalayo.
Ang mga pamilya nga nasunugan ang gin-evacuate kag gintatap man sa Barangay.
