Apisar sa kasakuon sa iya trabaho, gina-pasiguro sang hepe sang Bacolod City Police Station 7 nga wala sini ginapabay-an ang iya katungdanan bilang padre de pamilya.
Sa special episode sang Kahapon Lamang program para sa Father’s Day, gin-pakigbahin ni Police Major Sherlock Gabana ang iya obligasyon bilang amay sang ila puluy-an kag sang Police Station 7.
Suno kay Gabana, gina-painchindi gid sini sa iya mga kapulisan nga ang iya pagka-istrikto sa sulod sang istasyon ang daw kaangay lang sang isa ka amay nga gina-disiplina ang iya mga kabataan para sa katawhayan kag pag-ugyon sang isa kag isa.
LOVE LIFE:
Tuig 2008 sang nag-pakasal si Gabana kag ang iya nga asawa nga si Jona sa diin sila ang nahatagan sang 3 ka mga kabataan.
Suno kay Gabana, una sila nagkitaay sang iya asawa sadtong kolehiyo sila kag nag-padalagan ini bilang student governor samtang nag-padalagan naman bilang student senator ang iya asawa sa ila departmento.
Si Gabana ang nag-gradwar sa kurso nga Criminology samtang Political Science naman ang iya asawa nga si Jona sa University of Negros Occidental-Recoletos.
Na “love at first sight” naman ang hepe sang nakita niya ang iya asawa sa ila nga buluthuan.
Bangud diri, gin-pabutyag sini ang iya balatyagon paagi sa pag-pangaluyag kag nakuha man sini ang pagsalig sang iya asawa sa diin ginhatag sa iya ang matam-is nga tinaga nga “Huo”.
PAMILYA:
Mapilahan ka tuig bilang magkahagugma, nag-proposed si Gabana sa iya asawa nga mag-updanay na sa isa ka puluy-an sa diin sila ang gin-bugayan sang 3 ka mga kabataan nga amo sanday Kistelle Sher Beatrice ukon si Kissbe, 10 anyos; Sherlock II ukon si Hugbe, 5 anyos kag si Kylie Sher Eunice nga manug 1 ka tuig.
Nangin emosyonal ang hepe sang iya ginsaysay nga sadtong yara pa siya sa probinsya sang Antique, masami nga naga-hibi ang iya kamagulangan nga bata nga si Kissbe kun matapos na ang ila tawganay.
Apisar nga masakit sa balatyagon sini bilang isa ka amay nga mahibaluan nga masubo ang iya bata bangud malayo sila sa isa kag isa, iya ini gin-agwanta agud mahatagan sang maayo nga bwas-damlag ang iya pamilya.
Sang gin-saylo na ini sa syudad sang Bacolod, tuman na ang iya kalipay bangud mahatagan na sini sang atensyon kag oras ang iya pamilya.
Suno kay Gabana, samtang nagadako ang iya kabataan, tatlo ang iya ginatungdan nga papel nga amo ang Fatherhood, playmate, kag best friend, agud mas mangin bukas pa gid ang ila relasyon sa isa kag isa sa diin wala sila sang may ginatago kun ano man ang ila problema.
Apisar nga kapoy na ini sa iya trabaho, gina-tinguhaan sa gihapon ni Gabana nga maghatag sang oras sa iya kabataan kun makapauli ini sa ila puluy-an.
Naga-pangita man ini sang paagi agud madul-ong ang iya kabataan kada aga nga naga-eskwela sa St. John’s Institute ukon Hua Ming.
Gina-adjust man sini ang iya oras kun may palagwaon ukon may awards ang iya bata sa buluthuan.
Gin-ako man sini nga kun kaisa, nagalain ang buot sang iya asawa bangud may pila ka mga special occasions sa ila pamilya nga indi siya makatambong bangud sa kasakuon sang iya obra kag naga-kadungan sa ila operasyon.
Nagabawi man si Gabana sa iya pamilya kun maka-pauli siya sa ila balay, kag gina-eksplekar gid sini nga indi sa tanan nga tion mahatag niya ang oras nga gina-pangayo nila ilabi na ang special days sa ila kabuhi.
Apang bangud mas naga-pangibabaw ang pag-palangga, pilit nga gina-inchindi sang iya asawa ang sitwasyon.
Samtang, wala naman napunggan ni Kissbe nga magtulo ang iya luha sang ginhambal sini nga palangga niya gid ang iya amay kag kun wala ini sa ila panimalay, nagaka-miss niya gid ini.
Naglumaw-lumaw naman ang mata ni Gabana samtang gina-pabutyag sang iya bata ang pag-palangga sa iya kag indi na sini luyag nga maglayo-anay pa sila liwat.
Apang kun may pag-palangga kag pag-hangpanay ang isa ka pamilya, indi gid ini maguba suno kay Gabana.
Bilang isa ka amay, himuon gid sini ang tanan agud maprotektahan ang iya pamilya.
