Nagapanawagan ang Presidente sang Bacolod Public School Teacher’s Federation nga masolbar ang problema sa kakulang sang classrooms kag mga manunudlo antes ang pagsugod sang School Year 2024-2025 ilabi na nga ginalauman ang pagdamo sang enrollees sa senior high school sa mga public schools matapos ginpahayag sang Commission on Higher Education (CHED) nga indi na magbaton ang mga state kag local colleges and universities sang nasambit nga programa.
Suno kay Richard Gelangre, apisar nga nagpasalig ang Department of Education nga preparado kag makaakomodar ang mga public schools sa mga madisplace nga senior high school students, ang realidad, sa karun ginakulang sa gihapon sang mga classrooms kag manunudlo ang mga eskwelahan.
Suno kay Gelangre, nga amu man sa karun ang Principal sang Bacolod City National High School, ginalauman nga magadamo ang enrollees sa Senior High School sa mga public schools kag may mandato sila nga indi pwede makarefuse sang enrollment.
Gani nagakahangawa ini bangud ginakulang sila sang mga manunudlo, may kakulang man sang mga pulungkuan, kasubong man sa mga classrooms rason kun ngaa nagapatigayon sila sang shifting bangud indi makasarang nga tingbon ang mga estudyante sa isa ka classroom.
Sa karun, may yara sang kapin 3,000 nga mga senior high school students sa BCNHS kag may 15 pa ka mga manunudlo nga kulang ang buluthuan.
Kun madugangan pa gid ang numero sang mga estudyante sa senior high sa masunod nga school year, ang mga manunudlo amu ang magaantos kag ang school system.
Suno sa iya, kun indi makahatag sang dekalidad nga serbisyo, ang mga manunudlo kag administrasyon sang buluthuan naman dayon ang mabasulan.
Nagalaom si Gelangre nga maathag sang DepEd kun ano ang matabo kag paano masolbar ang ini nga mga kakulangan sa resources antes magsugod School Year 2024-2025 sa bulan sang Agosto.
Nagapati na ini nga indi na mabawi sang CHED ang ila desisyon bangud ini ang naanunsyar na kag nagakapatigayon na sang mga meetings antes ang anunsyo gani nagalaom na lamang ini nga mahatagan sang solusyon ang problema sang mga public schools agud makaakomodar sang dugang nga mga estudyante sa senior high.
