Ginpatpat sang Presidente sang Alliance of Concerned Consumers in Electricity and Social Services (ACCESS) ang rasun kun ngaa kulang gihapon ang kuryente sa Negros Occidental apisar nga madamo na sang mga solar power.
Sa interview sang Bombo Radyo Bacolod kay Wennie Sancho, ang ACCESS ang naga-upod gid sa lihok nga pagbaylo sa Renewable Energy.
Apang ang problema ang yara sa Negros Grid Corporation of the Philippines (NGCP) kag sa transmission lines.
Paathag sini nga ginconstruct ang power grid nga wala pa sa systema ang renewable energy.
Suno diri, indi balanse ang haboy sang kuryente sang gikan sa solar power indi kaangay sang gikan sa coal power plant.
Pahayag ni Sancho nga indi man tayuyon ang pagsupply sang kuryente sang solar power bangod sila ang makaganar lamang sang bastante kun may silak sang adlaw.
Sa karun, gina-amat amat pa upgrade ang Grid agud nga macater ang bag-o nga systema.
Apang aminado si Sancho nga kinahanglan na sang Consumers Education Awareness Program (CEAP).
Pahanumdom sini nga kun may ihibalo ang konsumedor, sila ang may diber sa pagreklamo kun makahalit na ang mga demands sang electric cooperative.
Bilang konsumedor nga nagabayad sang husto sa serbisyo, kinamatarong man sang konsumedor nga manukot kun kulang ang serbisyo nga mabatun.
Kaangay sa natabo nga lapnagon nga blackout sang summer sang 2024, kun sa diin ang NGCP ang wala gid nakahatag sang tarong nga paathag.
Apang kun padalman, nagapati si Sancho nga daan na nga mga equipments kag facilities ang rasun sini.
Suno diri, dapat may-ara sang ancillary services ang NGCP ukon reserve energy nga amo ang ma-augment inkaso magpalyar sa pagdistribute ang power plant.
Apang ini ang wala ginatuman sang NGCP.
Suno diri, nagsulat ini mismo sa NGCP kag gin-ako man sang kompanya ang ila kapaltahan, gani sila ang naga-upgrade na sa karun sa modern equipments.
Pahanumdom man sini sa mga distribution companies nga dapat magsabay man sa modernization.
