Isa ka 14-anyos nga estudyante sa banwa sang EB Magalona ang nagpakilala nga nabiktima man sang supplier nga si Zaila Marie Dalida sang Barangay Bata, ciudad sang Bacolod kag nagahulat nga marefund ang masobra P60,000 nga kwarta nga iya ginbayad para sa gin-order nga items nga wala nadeliver.
Sa interview sang Bombo Radyo kay Sheena, 20 ka overruns nga items ang una niya nga gin-order kay Dalida sang bulan sang Mayo apang wala nag-abot.
Nag-order liwat si Sheena kag ginpahayag ni Dalida nga katapusan nga semana sang Hulyo ukon una nga semana sang Agusto ang arrival.
Apang sa katapusan nga semana sang Hulyo, ginpahayag sang supplier nga malayo pa sa Pilipinas ang shipment gani gindumdom man ni Sheena nga delayed lang ang delivery.
Ang ikaduha nga order sang 14-anyos nga nagaraket agud makabulig sa iya nga lola sa EB Magalona ang nagabalor sang P51,000 gani nagdangat sa P62,000 ang kabug-usan niya nga order.
Nagrequest sang refund si Sheena apang wala nagapakita si Dalida tubtub nga wala na ini nagareply sa chat messages.
Suno sa estudyante, ginasukot ini sang iya nga mga buyers bangud ang kwarta niya nga ginbayad niya kay Dalida ang nagikan sa mga buyers kag indi iya kaugalingon nga kapital.
Panindugan ni Sheena, nakahibalo man ang iloy ni Dalida angot sa iya modus apang madamo ini sang balibad kag ginadala-dala lang niya sa hibi kun ila nga sukton.
