Aminado ang tagpamaba sang Department of Education (DepEd) Division of Negros Occidental nga kalabanan nga ginpili sang mga estudyante kag ginikanan nga modality sa probinsya amo ang modular learning.
Sa interview sang Bombo Radyo Bacolod kay Ian Arnold Arnaez, ginpahayag sini nga bangud napalibutan sang banwa kag syudad ang probinsya sang Negros Occidental kag madamo ang malayo nga mga kabarangayan, mas ginpili ang modular learning.
Suno diri, ang modules ang libre bangud ginhimo ini sang DepEd national office kasubong man ang mga content sini apang may yara sang content nga igalocalize.
Nagabulig man ang Local Government Units (LGU) kag mga partners sang DepEd Division of Negros Occidental sa pagplano kun paano iimprinta ang mga modules.
Ginpahayag man sini nga may yara sang gin-aprubahan ang provincial school board nga P59 million nga Special Education Fund nga gamiton sa pagbakal sang material para sa printing sang modules.
Dako man suno diri ang katungdanan sang ginikanan sang mga estudyante sa pagpatuman sang modular learning.
Samtang may yara man sang pila ka mga eskwelahan nga nagpili sang online learning kaangay sang Negros Occidental Science High School bangud may yara sila sang mga estudyante nga nagapuyo sa syudad ukon probinsya sang Negros Occidental.
